(۳۲) وَكَانَ مِنْ دُعَآئِهٖ عَلَیْهِ السَّلَامُ بَعْدَ الْفَرَاغِ مِنْ صَلَاةِ اللَّیْلِ لِنَفْسِهٖ فِی الْاِعْتِرَافِ بِالذَّنبِ۔ اعترافِ گناہ کے سلسلہ میں حضرتؑ کی دعا جسے نمازِ شب کے بعد پڑھتے۔

اس دعا کو نماز شب کے بعد پڑھنا چاہیے۔ نمازِ شب کا اطلاق کبھی آٹھ رکعتوں پر ہوتا ہے اور کبھی شفع و وِتر کی نمازوں کو ملا کر گیارہ رکعتوں پر اور کبھی نافلۂ صبح کو بھی ان کے ساتھ ملا کر تیرہ رکعتوں پر۔ علامہ سید علی خانؒ نے تحریر فرمایا ہے کہ شیخ الطائفہ شیخ ابو جعفر طوسیؒ نے ”مصباح“ میں اور شیخ بہاؤ الدین عاملی نے ”مفتاح“ میں لکھا ہے کہ اسے تیرہ رکعتوں کے بعد پڑھنا چاہیے. اور کفعمی رحمہ اللہ نے اس دعا کو نقل کیا ہے اور فرمایا ہے کہ اسے گیارہ رکعتوں کے بعد پڑھنا چاہیے ۱۔ بہرحال خواہ تیرہ رکعتوں کے بعد پڑھے یا گیارہ رکعتوں کے یا آٹھ رکعتوں کے، تینوں صورتوں میں اسے پڑھا جا سکتا ہے۔

نماز شب کا آسان و مختصر طریقہ یہ ہے کہ نصف شب کے بعد دو دو رکعت کر کے آٹھ نوافل پڑھے۔ پہلی رکعت میں حمد اور سورۃ توحید اور دوسری رکعت میں حمد اور سورۃ قل یا ایھا الکافرون یا سورۃ توحید پڑھے اور دوسری رکعتوں میں حمد اور جو سورہ چاہے پڑھے، اور ہر دوسری رکعت میں قبل رکوع قنوت پڑھے جس میں تین مرتبہ سبحان اللہ کہہ لینا کافی ہے۔ اس کے بعد دو رکعت نماز شفع پڑھے اور دونوں رکعتوں میں سورۃ حمد کے بعد سورہ توحید پڑھے۔ نماز شفع کے بعد ایک رکعت نماز وتر پڑھے اور اس میں بھی سورہ حمد و سورہ توحید پڑھے اور قبل رکوع قنوت بھی پڑھے اور مستحب ہے کہ قنوت میں چالیس افراد کیلئے نام بنام دعا مانگے اور پھر رکوع و سجود و تشہد کے بعد نماز تمام کرے اور بعد ختم نماز تسبیح حضرت زہرا سلام اللہ علیہا پڑھے۔

نماز شب کا وقت اگرچہ نصف شب کے بعد شروع ہو جاتا ہے، مگر جس قدر صبح صادق کے قریب ہو اتنا بہتر ہے اور اگر کوئی عذر مانع ہو تو نصف شب سے پہلے بھی پڑھی جا سکتی ہے، لیکن اس سے بہتر یہ ہے کہ بعد میں بہ نیت قضا پڑھے، اور اگر طلوع صبح صادق سے پہلے چار رکعت پڑھ چکا ہو تو پھر بقیہ رکعتیں بھی ادا کر لے اور اس صورت میں صرف سورۂ حمد پر اکتفا کرے۔

ریاض السالکین، ج ۵ ص ۱۱