(۴۵) وَكَانَ مِنْ دُعَآئِهٖ عَلَیْهِ السَّلَامُ فِیْ وَدَاعِ شَهْرِ رَمَضَانَ۔ دعائے وداع ماہ رمضان۔

یہ دعا ماہ رمضان کے برکت آفرین لمحات کو الوداع کرنے کے سلسلہ میں ہے۔ لفظ ”وداع“، دعة سے ماخوذ ہے جس کے معنی راحت و آرام اور پرسکون زندگی کے ہیں۔ اور مسافر کو وداع کرنے کا مطلب یہ ہوتا ہے کہ اس سے اپنی محبت و دل بستگی کا اظہار کیا جائے اور اس کیلئے دعا کی جائے کہ سفر کی صعوبتیں اس کیلئے آسان اور منزل کی دشواریاں اس کیلئے سہل ہوں اور اسے دوبارہ پلٹ کر آنا نصیب ہو، یا جہاں جانا چاہتا ہے وہاں سکون و قرار حاصل ہو۔ یہ وداع اس کی دلیل ہے کہ جسے وداع کیا جا رہا ہے نگاہوں میں اس کی عزت اور دل میں اس کی قدر و منزلت ہے اور اس کی جدائی گراں اور مفارقت شاق ہے۔ یہ محبت اور لگاؤ زمان سے بھی ہو سکتا ہے اور مکان سے بھی۔ ذی شعور سے بھی ہو سکتا ہے اور غیر ذی شعور سے بھی۔ چنانچہ اسی محبت و وابستگی کے نتیجہ میں انسان کبھی ماضی کے ان لمحوں کو پکارتا ہے جو اپنی خوشگوار یاد دل میں چھوڑ جاتے ہیں اور کبھی شباب کی گھڑیوں کو خطاب کرتا اور عمر رفتہ کو آواز دیتا ہے، اور کبھی اداس کھنڈروں، خاموش ویرانوں اور شکستہ دیواروں سے خطاب کرتا ہے اور کبھی ان کی زبان بے زبانی کی خود ترجمانی کرتا اور کبھی ان سے بولنے اور جواب دینے کی فرمائش کرتا ہے۔ چنانچہ عرب کا ایک شاعر کہتا ہے:

يَا دَارَ عَبْلَةَ بِالْجِوَآءِ تَكَلَّمِیْ، وَعِمِیْ صَبَاحًا دَارَ عَبْلَةَ وَاسْلَمِیْ

”اے مقام جوا میں واقع ہونے والے عبلہ کے گھر !کچھ بول کہ میں گوش بر آواز ہوں، تیری صبحیں غارت گری سے محفوظ اور تو گردش زمانہ سے بچا رہے“۔

اسی طرح ماہ رمضان کے لمحوں اور ساعتوں سے خطاب کرنا اس سے انتہائی وابستگی کی دلیل ہے۔ کیونکہ خاصان خدا کو ذکر الٰہی، اطاعت خداوندی اور عبادت سے اتنی شیفتگی ہوتی ہے کہ وہ عبادت کے مخصوص دنوں اور لمحوں سے بھی والہانہ محبت کا اظہار کرتے ہیں اور ان لمحوں کی جدائی کو اتنا ہی محسوس کرتے ہیں جتنا دل باختگان محبت، محبوب کی جدائی کو اور اسی طرح بجھے ہوئے دل اور مرجھائے ہوئے چہرے کے ساتھ انہیں الوداع کرتے ہیں جس طرح محبوب کو رخصت کیا جاتا ہے۔ چنانچہ حضرتؑ اواخر ماہ رمضان میں یہ دعا پڑھتے اور تحسر آمیز جذبات کے ساتھ اسے الوداع کرتے۔

یہ دعا انہی لوگوں کیلئے ہے جنہوں نے اس ماہ مبارک کے لمحات عبادت و اطاعت میں گزارے ہوں، واجبات ادا کئے ہوں اور محرمات سے کنارہ کش رہے ہوں۔ اور جنہوں نے نماز روزہ سے کوئی واسطہ نہ رکھا ہو تو انہیں اس کے آنے پر خوشی ہی کیا تھی کہ جانے کا رنج کریں اور اسے الوداع کرنے کی ضرورت محسوس کریں۔ البتہ جنہوں نے خدا کی خوشنودی کا سر و سامان کیا ہو اور اس کے مبارک لمحات میں زاد آخرت بہم پہنچایا ہو، فرائض و واجبات ادا کئے ہوں، انہیں الوداع کرنا چاہیے، تا کہ ان کے حسنات میں مزید اضافہ ہو اور رحمت و مغفرت الٰہی کے اہل قرار پائیں۔ چنانچہ جابر ابن عبد اللہ انصاری کہتے ہیں:

دَخَلْتُ عَلٰى رَسُوْلِ اللّٰهِ فِیْۤ اٰخِرِ جُمُعَةٍ مِّنْ شَهْرِ رَمَضَانَ۔ فَلَمَّا بَصُرَ بِیْ قَالَ لِیْ: يَا جَابِرُ! هٰذَا اٰخِرُ جُمُعَةٍ مِّنْ شَهْرِ رَمَضَانَ فَوَدِّعْهُ وَقُلِ: اللّٰهُمَّ لَا تَجْعَلْهُ اٰخِرَ الْعَهْدِ مِنْ صِيَامِنَا اِيَّاهُ، فَاِنْ جَعَلْتَهٗ فَاجْعَلْنِیْ مَرْحُوْمًا وَّلَا تَجْعَلْنِیْ مَحْرُوْمًا۔ فَاِنَّهٗ مَنْ قَالَ ذٰلِكَ ظَفِرَ بِاِحْدَى الْحُسْنَيَيْنِ: اِمَّا بِبُلُوْغِ شَهْرِ رَمَضَانَ، وَاِمَّا بِغُفْرَانِ اللّٰهِ وَرَحْمَتِهٖ۔

میں ماہ رمضان میں جمعة الوداع کے دن پیغمبر اکرمؐ کی خدمت میں حاضر ہوا۔ آنحضرتؐ نے مجھے دیکھا تو فرمایا کہ اے جابر! یہ ماہ رمضان کا آخری جمعہ ہے، لہٰذا اسے وداع کرو اور یہ کہو ”اے اللہ! اسے ہمارے روزوں کا آخری زمانہ نہ قرار دے اور اگر تو نے قرار دیا ہے تو ہمیں اپنی رحمت سے سرفراز کر اور محروم نہ کر“۔ تو جو شخص یہ کلمات کہے گا تو وہ دو خوبیوں میں سے ایک خوبی کو ضرور پائے گا، یا تو آئندہ کا ماہ رمضان اسے نصیب ہو گا، یا اللہ تعالیٰ کی مغفرت و رحمت اس کے شامل حال ہو گی۔ ۱

یہ دعا جمعة الوداع یا ماہ رمضان کی آخری شب یا آخری روز میں پڑھنا چاہیے اور آخری شب میں سحر کے وقت پڑھنا بہتر ہے۔ اور اس سے بہتر یہ ہے کہ جمعة الوداع میں بھی پڑھے اور آخری شب میں بھی پڑھے۔ اور اگر یہ خیال ہو کہ چاند انتیس کا ہو گا تو انتیسویں شب میں پڑھے اور چاند نہ ہو تو تیسویں شب میں بھی پڑھے اور ایک قول یہ ہے کہ شب عید پڑھے۔

وسائل الشیعہ، ج ۱۰ ص ۳۶۵