(۵۲) وَكَانَ مِنْ دُعَآئِهٖ عَلَیْهِ السَّلَامُ فِی الْاِلْحَاحِ عَلَى اللّٰهِ تَعَالٰى۔ اللہ تعالی سے طلب و الحاح کے سلسلہ میں حضرتؑ دعا۔

یہ دعا اللہ تعالیٰ سے طلب و الحاح کے سلسلہ میں ہے۔ ”الحاح“ کے معنی طلب و سوال میں اصرار اور مسلسل و پیہم مانگنے کے ہیں۔ اگر یہ الحاح اللہ تعالیٰ سے ہو تو ممدوح اور قابل ستائش ہے اور بندوں سے ہو تو نہایت مذموم ہے۔ اول تو سوال ہی بری چیز ہے چہ جائیکہ اس میں الحاح کا بھی پہلو ہو۔ یہ دنائت نفس اور پستئ ضمیر کی علامت ہے۔ اس سے انسان کی عزت داغدار اور حمیت و غیرت پامال ہو جاتی ہے۔ اس لیے اللہ سبحانہ اسے ناپسندیدہ نظروں سے دیکھتا ہے اور یہ گوارا نہیں کرتا کہ اس کے بندے اپنے ایسوں کے آگے ہاتھ پھیلائیں اور ان کے سامنے گڑگڑائیں۔ بلکہ وہ یہ چاہتا ہے کہ اس کے بندے مانگیں تو اسی سے مانگیں اور الحاح و عاجزی کا ہاتھ پھیلائیں تو اسی کے آگے پھیلائیں۔ چنانچہ امام جعفر صادق علیہ السلام کا ارشاد ہے:

اِنَّ اللّٰهَ عَزَّ وَجَلَّ كَرِهَ اِلْحَاحَ النَّاسِ بَعْضِهِمْ عَلٰى بَعْضٍ فِی الْمَسْئَلَةِ وَاَحَبَّ ذٰلِكَ لِنَفْسِهٖ۔ اِنَّ اللّٰهَ عَزَّ وَجَلَّ يُحِبُّ اَنْ يُّسْئَلَ وَيُطْلَبَ مَا عِنْدَهٗ۔

خداوند عالم آپس میں ایک دوسرے سے طلب و سوال میں الحاح و اصرار کو ناپسند کرتا ہے اور اپنے لیے اسے دوست رکھتا ہے۔ خدائے بزرگ و برتر یہ چاہتا ہے کہ اس سے سوال کیا جائے اور اس کے ہاں کی چیزوں کو طلب کیا جائے۔ ۱

بندہ جب اپنے معبود کے در پر دستک دیتا اسے پکارتا اور عجز و الحاح سے سوال کرتا ہے تو یہ اس کی دلیل ہے کہ اس کا احساس عبودیت زندہ ہے اور اللہ تعالیٰ سے حسن ظن برقرار رکھے ہوئے ہے۔ اور شیوۂ عبودیت یہی ہے کہ وہ پیہم اس کے سامنے ہاتھ پھیلائے اور اپنی حاجتیں اس کے سامنے پیش کرے اور کسی حالت میں مایوس نہ ہو، خواہ قبولیتِ دعا میں کتنی دیر ہو جائے۔ کیونکہ امید و رجاء کے جلو میں اس سے بار بار طلب کرنا خود ایک عبادت اور پسندیدہ عمل ہے جس سے غفلت کرنا اللہ تعالیٰ کی ایک نعمت سے محروم ہونا ہے۔ چنانچہ پیغمبر اکرمؐ کا ارشاد ہے:

رَحِمَ اللّٰهُ عَبْدًا طَلَبَ مِنَ اللّٰهِ عَزَّ وَجَلَّ حَاجَةً فَاَلَحَّ فِی الدُّعَآءِ، اسْتُجِيْبَ لَهٗ اَوْ لَمْ يُسْتَجَبْ۔

خدا اس بندے پر رحم کرے جو خدائے بزرگ و برتر سے کوئی حاجت طلب کرتا ہے تو بار بار دعا کرتا ہے۔ چاہے اس کی دعا قبول ہو یا نہ ہو۔ ۲

دعا کا اصل مقصد ہی یہ ہے کہ اس کے پردہ میں اللہ تعالیٰ سے لو لگی رہے۔ اور بعض چیزوں کو دعا سے وابستہ کرنے کی وجہ یہی ہے کہ انسان ان کے حصول کیلئے دعا و الحاح کرتا رہے اور گڑگڑانے اور لپٹنے سے اس کے خزانہ پر تو کوئی اثر پڑتا نہیں کہ اسے ناگوار گزرے اور نہ داد و دہش سے اس کے ہاں کمی ہوتی ہے کہ کسی کے بار بار مانگنے سے وہ رنجیدہ و کبیدہ خاطر ہو۔ کیونکہ کمی بیشی کا سوال وہاں ہوتا ہے جہاں سرمایہ محدود ہو اور جس کے مقدورات کی کوئی حد و نہایت ہی نہ ہو اس کیلئے کمی بیشی کے معنی ہی کیا۔ اور پھر یہ کہ کمی بیشی احتیاج کی علامت ہے اور وہ غنئ مطلق ہے جس کے ہاں نہ عطا کرنے سے کمی اور نہ روک لینے سے اضافہ ہوتا ہے۔

الکافی، ج ۲ ص ۴۷۵

وسائل الشیعہ، ج ۷ ص ۵۹